UWEZEKANO WA KUBADILISHA MUUNDO WA MUUNGANO WA SERIKALI MBILI HADI TATU KATIKA MCHAKATO WA KATIBA NI KITENDAWILI,"SEFUE"

Katibu Mkuu Kiongozi Ombeni Sefue. 

Katibu Mkuu Kiongozi, Balozi Ombeni Sefue amesema hakuna uwezekano wa kubadili muundo wa muungano kutoka Serikali mbili kwenda Serikali tatu katika mchakato wa Katiba. 

Kauli ya Balozi Sefue imekuja ikiwa ni siku chache tangu Rais Jakaya Kikwete kukutana na viongozi wa Kituo cha Demokrasia (TCD) na kutoa uamuzi wa kuahirisha mchakato wa Katiba hadi baada ya uchaguzi mkuu wa mwaka 2015.

Suala la muundo wa muungano lilichukua mjadala mkali ndani ya Bunge Maalumu la Katiba huku wajumbe wanaounda kundi la Ukawa wakiunga mkono mapendekezo ya Rasimu ya Katiba ya muundo wa Serikali tatu na wajumbe wa CCM wakisisitiza muundo wa Serikali mbili.

Akizungumza katika mahojiano maalumu , Balozi Sefue alisema mchakato wa Katiba unahitaji maridhiano, lakini suala la muundo wa muungano halina maridhiano katika jamii hivyo litachelewesha upatikanaji wa Katiba:

“Katika historia ya nchi yoyote, wakati unafika wananchi wakawa na maridhiano fulani, wakaamua kuyaingiza ndani ya Katiba. Tatizo linajitokeza pale watu au makundi fulani yanapong’ang’ania kuingiza ndani ya Katiba mambo ambayo ni dhahiri hayana maridhiano ndani ya jamii. Mfano ni suala la muundo wa Muungano,” alisema na kuongeza:

“Uzoefu wa Bunge Maalumu hadi sasa ni kuwa hakuna uwezekano wa kupata maridhiano ya kubadili muundo wa Muungano kutoka Serikali mbili kwenda tatu. Hutapata maridhiano hayo ndani ya Bunge Maalumu na hutapata maridhiano ukienda kwa wananchi,” alisema.

Alisema anaamini wajumbe wa Bunge Maalumu walifanya uamuzi wa busara kuliweka kando jambo hilo linalotugawa, na kuendelea kujadili Rasimu ya Katiba kwa msingi wa mfumo uliopo wa Serikali mbili,” alisema.

Balozi Sefue aliongeza kuwa tangu suala hilo liwekwe kando kumekuwa na kasi na matumaini ya kupata Katiba Mpya.

Alisema jambo hilo ni kubwa na uzoefu unaonyesha lina uwezo mkubwa wa kutugawa na kuchelewesha kupatikana kwa Katiba Mpya.

Balozi Sefue alisema Tume ya Mabadiliko ya Katiba iliamini yatapatikana maridhiano kuhusu kubadili muundo wa Muungano, ilivyo sasa, ni wazi kuwa maridhiano kuhusu mabadiliko hayo hayapo na hayatapatikana.

“Hakuna idadi ya makongamano na maandamano yatakayobadili hali hiyo sasa,” alisema.

Licha ya kusema kuwa kuna matumaini ya kupata Katiba Mpya, Balozi Sefue alisema ikishindikana Katiba iliyopo itafanyiwa marekebisho ili ituvushe hadi mchakato utakaporejeshwa tena.

“Naelewa hisia za wanaokata tamaa kuwa pengine tunapoteza muda na fedha, lakini ni jambo la kawaida kwa mchakato wa kutunga Katiba kupita katika misukosuko. Jambo muhimu la kuzingatia ni kuwa Katiba ni maridhiano ndani ya jamii kuhusu namna wananchi wanavyotaka kutawaliwa.”

Ajivunia utawala wa Rais Kikwete

Kuhusu utendaji wa Rais Jakaya Kikwete, Balozi Sefue amesema kuwa Watanzania wana bahati ya kuongozwa na Rais huyo akisema kuwa amefanya mambo makubwa katika utawala wake.

“Kwanza niseme kuwa Watanzania tunayo bahati sana, kipindi cha awamu hii kumekuwa na mivutano mingi ya kisiasa, ndani ya vyama na baina ya vyama. Kila mivutano hii ilipotokea, Rais Kikwete alifanikiwa kuturudisha kwenye mstari,” alisema na kuongeza.

Alisema uchumi umeendelea kukua kwa viwango kati ya asilimia sita na saba, na sasa tuko tayari kuvuka hapo na kuelekea asilimia nane na mfumuko wa bei umedhibitiwa vya kutosha na unaweza kuwa wastani wa asilimia tano kabla awamu hii haijamaliza muda wake.

Sefue alisema pato la wastani la kila mtu kwa mwaka sasa limefikia dola 742 kwa bei za Dola ya Marekani sawa na Sh1,200,000.

Aliendelea kusema kuwa takwimu za Sensa ya Makazi na Watu ya 2012 imeonyesha ongezeko kubwa la hali ya maisha na kwamba wastani wa umri wa kuishi umefikia miaka 61 huku idadi ya wananchi walio katika umaskini uliokithiri sasa ni chini ya asilimia 10, na wenye umaskini wa mahitaji ya msingi ni chini ya asilimia 30.

“Hivyo siyo kweli kuwa uchumi wetu unakua kwa tarakimu tu, bali yapo mabadiliko ya wazi katika ubora wa maisha ya wananchi walio wengi.”

Aligusia pia eneo la uchumi akisema kumekuwa na juhudi za kuondosha vikwazo vya uchumi kukua na kupanua fursa za wananchi kujiendeleza. Amevitaja vikwazo vilivyowekewa mkazo ni miundombinu, hususan barabara, bandari, reli, umeme na maji.

“Kwenye kila pembe ya nchi utaona kazi zinazoendelea za kujenga barabara za lami na changarawe, na kuwekeza kwenye kufua, kusafirisha na kusambaza umeme,” alisema.

Balozi Sefue alisema uzoefu unaonyesha kuwa ukishawapatia wananchi barabara nzuri, umeme wa uhakika na maji, yanatokea mabadiliko makubwa ya kiuchumi na kijamii katika kila jamii husika.

 Alisema mwaka 2002 ni asilimia 10 tu ya wananchi walipatiwa umeme, leo umeme umewafikia asilimia 36 ya wananchi, na asilimia 24 tayari wameunganishiwa umeme.

Ametaja pia mafanikio katika sekta ya elimu na huduma za jamii ikiwa pamoja na uboraji wa shule za msingi wa sekondari na elimu ya juu.

“Elimu ya juu imepanuka sana. Chuo Kikuu kipya na kikubwa sana cha Serikali kimejengwa Dodoma, pamoja na Taasisi ya Nelson Mandela kule Arusha, Chuo Kikuu cha Sayansi na Teknolojia cha Mbeya na Chuo Kikuu cha Kilimo kinachopangwa kujengwa Butiama pamoja na Kampasi mpya ya Chuo Kikuu cha Afya na Sayansi Shirikishi Muhimbili kule Mloganzila, ni mifano ya wazi,” alisema na kuongeza:

“Kwenye afya tunapiga hatua kubwa kupunguza kasi ya Ukimwi na malaria na kupunguza sana vifo vya watoto chini ya umri wa miaka mitano, na kadhalika.”

Utawala Bora

Kuhusu utawala bora, Balozi Sefue amemwagia pia sifa Rais Kikwete kwa kuziimarisha taasisi zake ambazo ni na kuongeza matumizi ya teknolojia ya habari na mawasiliano, vitendea kazi, majengo na mafunzo ya mahakama, taasisi ya Kuzuia na Kupambana na Rushwa (Takukuru), Tume ya Maadili ya Umma na Sekretarieti yake, Ofisi ya Mdhibiti na Mkaguzi Mkuu wa Hesabu za Serikali na Ofisi ya Mkurugenzi wa Mashtaka.

“Kwenye ulinzi na usalama, ameongeza na kuboresha sana mazingira ya kufanyia kazi ya Jeshi la Ulinzi la Wananchi wa Tanzania, yakiwamo masilahi, mafunzo na silaha za kisasa; amerejesha Jeshi la Kujenga Taifa kwa mujibu wa sheria; na ameanzisha maboresho makubwa ya Jeshi la Polisi, miongoni mwa mengine mengi,” alisema.

Kustaafu

Kuhusu kustaafu kwake, Balozi Sefue anasema amefanya kazi kwa muda mrefu na angependa kupumzika baada ya kustaafu.

“Kazi ya Katibu Mkuu Kiongozi ina msongo wa mawazo. Natarajia kupumzika baada ya kustaafu. Lakini nitatumia muda mwingi kusoma,” anasema.

Alisema ana vitabu vingi alivyonunua ambavyo hakupata nafasi ya kuvisoma na pengine anaweza kuandika vitabu pia na hana nia ya kuingia katika siasa.

Kuporomoka kwa maadili

Balozi Sefue alikiri kuporomoka kwa maadili kwa baadhi ya watumishi wa umma akisema ni matokeo ya tabia kama hiyo kwa jamii nzima:

“Zipo sababu nyingi za kuporomoka kwa maadili, siyo Tanzania tu bali duniani kote,” alisema.

Alisema malezi ni eneo moja linaloweza kusaidia; malezi ndani ya familia, na malezi kwa maana ya elimu shuleni, vyuoni na Jeshi la Kujenga Taifa, na elimu kwa maana ya mafundisho ya dini,” alisema na kuongeza:

“Utandawazi nao ni tatizo, hasa utandawazi wa utamaduni. Teknolojia ya Habari na mawasiliano, televisheni, mitandao ya kijamii social media, vyote vinachangia kuwapa vijana wetu, hata watu wazima, tamaa ya aina ya maisha ambayo ni nje ya uwezo wao.”

“Uchumi unavyokua, na bidhaa za kila aina zinapojaa madukani zinavutia macho na kuchangia watu kukosa subira na kuvitaka vitu hivyo leo, hata kama ni kwa vipato visivyo halali. Kwa usahihi, ingefaa kuwa tamaa ya maisha bora na kumiliki vitu vizuri iwe kichocheo cha kujituma na kuongeza kipato kwa njia halali, na si kwa njia ya mkato ya rushwa,” aliongeza.

Mawaziri mizigo

Kuhusu mawaziri mizigo, Balozi Sefue amekanusha kutoa kauli kwamba hakuna mawaziri mizigo kabla Rais Kikwete hajabadilisha Baraza la Mawaziri, bali aliitoa baada ya kuulizwa swali na mwandishi wa habari wakati akitangaza mabadiliko hayo:

“Msingi wa swali hilo ulikuwa kwamba baadhi ya mawaziri waliobakizwa ndani ya Baraza walikuwa miongoni mwa waliotajwa kuwa mizigo. Kwa bahati mbaya baadhi ya vyombo vya habari vilipotosha nilichosema,” alisema na kuongeza:

“Nilichosema ni kuwa Waziri anaitwa mzigo kwa vile inaonekana kuwa yapo mambo kwenye Wizara anayoiongoza ambayo hayaendi vizuri. Inawezekana Waziri ni tatizo, lakini inawezekana pia tatizo liko nje ya uwezo wake, kama vile uhaba wa fedha.”

“Jambo la pili ni kama Waziri huyo anaonekana kuwa anaelewa tatizo lililopo na anao mpango unaoridhisha wa kulishughulikia. Ikiwa hivyo ndivyo, Rais anaweza kumpa fursa nyingine ya kulishughulikia. Lakini si kweli kuwa nilisema hakuna mawaziri mizigo. Sikusema hivyo hata kidogo, na kwa maana hiyo sijapingana na yaliyosemwa na viongozi wa CCM.”

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.